Mandailing

Sinabiarna nagiot ona rampingkoni marpenong-penong jabat songon aruting nahona tuba, martingkat-tingkat boi nai songon gogat bulusoma, arana inda piga pokennaibe napalaluon ni amantai ma ningna caritona nagiot perampingani, pala namaramping mantong ibarat ni suping nanyiak dei boto, manyarira songon bugang nailasiakan doihot lasiak cino, ning Jatulillama markombur laos mangaregep karupuk jangek.
Baen kopi paeti Jabulele ning bayo nalobangon muse mantong sian jugukan niai, arana madung hona tu rungkungi kombur ni amanta Jatuliula, carito namarmping hubege, nagiot manyargut nanga ramping-ramping supping ning bayo nalobangoni salaos panaet sigaret 459.
Sangajo dabo anggo barisan nakarejo di pamarentahan kecek namaramping sajo doma binege caritona, nasongondiado langa dongan aha ni pagaweido nagiot marampingi, ampot sanga solop niado maramping, igonti antong dohot nabaru, tai anggo supping mantong nangkan namaramping lojape iba manjalai tabusan tupasar indaboto naadong supping tabusan, supping palsu doma ibaen, itukangan antong seng gontina anso mur matangkas parbinegeani, ning bayo nalobangoni musema salaos mangkardak godang doma sude halak naadong dilopo si Jabulelei.
Pamarentahanon ningna ibarat ni motor bahatan supir doma pado panumpangna, jadi angkon naipaotik doma supir, tontu bahatmei supir namanganggur, imada artina perampingan naidokon nihalaki, aturan bapak nagodang salolot naon angkan namanjadi bapak namenek doma, tontu bile parasaan ni halai nakarejo di kantor, imada boto anso songon gogatdoma deba boi nibayoi, apalagi bayo napal-palon marmiakdoma dilas niarii, ning Jatulilla musema salaos mangutur-utur tot.
Anggo caritoi dabo binege taiba carito mantong gorarna ampot namalopustudo sangape namarurang marlobi inda binoto, nagkan namarbolas halakdo nagit singgalak, patunda inda adong karocinabe, pala salolot naon antong ro kepalai ning halakdo, tai dung ona rampingkon kehe kepalai ning donagan muse doma, namancit dei antong ibarat ni bugang tarkoli jabat, haranii mada anso situtuna carito nagiot perampingan ni halak nakareji di pemerintahan, ning, Jamanopek muse mantong mandohot-dohoti caritoi.
Sangajo nariburdo boto binege carito perampinganon, gaor jombur nida halaki pahae-pahulu meos-keos songon uting nasala soban, songo dei dabo nian, pala salolot naon antong deges karosina, paten masukna, lagak pamakena, markilap tenggetonna, pala ona rampingkon taldusmei sude, tontu songon nacacingon domei nida araana inda tontu pamakenabe, inda iboto ia jabat taldus kotuk ni baju, songonimada boto ning Jatulilla musema manguduti caritoi.Anggo amantai ningna caritona halak namamboto adatdo, inda napalua osom ibana, anggo nadenggando parkarejo ni halaki inda mungkin ipatutopi ia, tai anggo na aut-aut tu adopdo salolot naon, nangkan na tos mei songon batang ni hayu naona sinso, ning bayo nalobangoni muse mantong mangalus.
Ita pamataima arana inda sadia lolotnaibe nagkan nabahatma naona rampingkon, adongmei namanopi-nopi, adong namaila mangida jolma, adong muse nasongon gulaen nahona tuba, napontingna adong mei songon endei, tali-patali-tali,tali tonggong tu batang pisang, pala ipasari-sari, juguk tondo manungkol isang ning Jatulillama salaos metukikkik.( Published By Admin Mandailing Online, October 29th, 2010 )